ព្រៃវែង៖ ក្រោយពីចំណាត់ការរបស់អាជ្ញាធររដ្ឋបាលរាជធានីភ្នំពេញ ក្នុងការហាមឃាត់មិនឱ្យមានបែរត្រីនៅភូមិសាស្រ្តបណ្តោយមាត់ទន្លេក្នុងរាជធានីភ្នំពេញ រួមទាំងការដាក់ឱសានវាទក្នុងរយៈពេល ៧ថ្ងៃឱ្យរុះរើនោះ យើងឃើញថាការអនុវត្តហាក់មានភាពល្អប្រសើរ និងប្រកបដោយប្រសិទ្ធិភាព ពោលគឺផ្ទះបណ្តែតទឹក និងបែរចិញ្ចឹមត្រីតាមបណ្តោយដងទន្លេក្នុងរាជធានីភ្នំពេញត្រូវបានរុះរើដោយស្ម័គ្រចិត្ត និងតាមវិធានការរបស់អាជ្ញាធរជាបន្តបន្ទាប់។
ដោយឡែក ក្នុងភូមិសាស្រ្តខេត្តព្រៃវែងឯណេះវិញ គេសង្កេតឃើញមានសកម្មភាពពាក់ព័ន្ធនឹងផ្ទះបណ្តែតទឹក និងបែរចិញ្ចឹមត្រីនេះដែរ ពោលគឺអាជ្ញាធរស្រុកពាមរក៍បានចុះមកហាមឃាត់ និងមិនអនុញ្ញាតឱ្យមាននូវផ្ទះបណ្តែតទឹក និងបែរចិញ្ចឹមត្រីចល័តក្នុងភូមិសាស្រ្តរបស់ខ្លួនដែរ។
នៅលើទំព័រហ្វេសប៊ុករបស់ អធិការដ្ឋាន ស្រុកពាមរក៏ កាលពីថ្ងៃទី ១៣ ខែមិថុនាកន្លងទៅបានបង្ហោះនូវសកម្មភាពមួយពាក់ព័ន្ធនឹងការចុះមកហាមឃាត់ផ្ទះបណ្តែតទឹក និងបែរចិញ្ចឹមត្រីរបស់ជនជាតិវៀតណាមចំនួន ៦៧ ដោយបញ្ជាក់ថា៖ "លោកវរសេនីយ៍ឯកសេង ពន្លក អធិការនគរបាលស្រុកបានដឹកនាំកម្លាំងអន្តរាគមន៍អធិការដ្ឋាននគរបាលស្រុកពាមរក៍រួម និងកម្លាំងនគរបាលប៉ុស្តិ៍រដ្ឋបាលឃុំ បានចុះហាមឃាត់មិនអោយទូកបែត្រីរបស់ជនជាតិវៀតណាមមកចុះចត រឺតាំងទីលំនៅតាមបណ្ដោយដងទន្លេមេគង្គចំនួន៦៧បែ ដែលស្ថិតនៅក្នុង ភូមិសាស្រ្ដស្រុកពាមរក៍" ។
ទន្ទឹមនឹងចំណាត់ការ និងសកម្មភាពរបស់អាជ្ញាធរស្រុកពាមរក៍នេះ គេឃើញមានការពេញចិត្តពេញថ្លើម និងចូលរួមសាទរយ៉ាងខ្លាំងពីប្រជាពលរដ្ឋ៕
